دیکھتی آنکھوں۔ سنتے کانوں۔آپ کو طارق عزیز کا آخری سلام پہنچے

 دیکھتی آنکھوں۔ سنتے کانوں۔آپ کو طارق عزیز کا آخری سلام پہنچے

پاکستان ٹیلیویژن کی تاریخ میں کئی سالوں  تک چلنے والے پروگرام ’نیلام گھر‘ سے شہرت پانے والے میزبان طارق عزیز دنیا فانی سے رخصت فرما گئے۔

ریڈیو پاکستان کے مطابق ان کا انتقال لاہور میں ہوا۔ ان کی عمر 84 برس تھی۔

جالندھر میں پیدا ہونے والے طارق عزیز نے اپنے کریئر کا آغاز ریڈیو پاکستان لاہور سے کیا  اور 1964 میں جب پاکستان ٹیلی ویژن کا آغاز ہوا تو وہ وہاں کام کرنے والی پہلےشخص تھے۔

طارق عزیز نے پاکستان کی پہلی ٹیلی  ویژن نشریات کی میزبانی بھی کی ۔

انھیں اصل شہرت پاکستان ٹیلیویژن پر 1975 میں’نیلام گھر‘ نامی پروگرام سے ملی۔

ان کا پروگرام شروع کرنے کا انداز ’دیکھتی آنکھوں، سنتے کانوں آپ کو طارق عزیز کا سلام‘پہنچے بہت مشہور ہوا تھا۔

40 برس سے زیادہ عرصے تک جاری رہنے والے اس پروگرام کو بعدازاں ' طارق عزیز شو' اورآخر میں  ’بزم طارق عزیز‘کا ہی نام دے دیا گیا تھا۔

طارق عزیز نے ریڈیو اور ٹی وی کے علاوہ فلموں اور ڈراموں میں بھی کام کیا تھا۔ ان کی مشہور فلموں میں سالگرہ، قسم اس وقت کی اور ہار گیا انسان شامل ہیں۔

طارق عزیز کے کالموں کا مجموعہ  ’داستان‘ کے نام سے جبکہ پنجابی شاعری کا مجموعہ ’ہمزاد دا دکھ‘ کے نام سے شائع ہوا تھا۔

طارق عزیز نے سیاست کے میدان میں بھی زورآزمائی کی تھی اور جہاں زمانہ  طالبعلمی میں وہ پاکستانی پیپلز پارٹی کے حامی تھے وہیں 1997 میں وہ مسلم لیگ ن کے ٹکٹ پر اسمبلی کے رکن منتخب ہوئے تھے۔

1997 کےالیکشن میں طارق عزیز نے پاکستان کے موجودہ وزیراعظم عمران خان کو شکست دی تھی۔

پاکستان کی حکومت نے طارق عزیز کی خدمات کے صلے میں انھیں 1992 میں صدارتی تمغہ حسنِ کارکردگی سے نوازا تھا۔