پاکستانی پائلٹس کے لیے اچھی خبر ملائیشیا نے تمام پاکستانی پائلٹس بحال کر دیے۔

پاکستانی پائلٹس کے لیے اچھی خبر ملائیشیا نے تمام پاکستانی پائلٹس بحال کر دیے۔

پائلٹس کے مبینہ جعلی لائسنس کا تنازعہ سامنے آنے کے بعد ملائیشیا میں کام کرنے والے پاکستانی پائلٹس کو وقتی طور پر گراونڈ کر دیا گیا تھا۔

ملائیشیا نے تمام پاکستانی پائلٹس بحال کر دیےہیں۔ پائلٹس کے مبینہ جعلی لائسنس کا تنازعہ سامنے آنے کے بعد ملائیشیا میں کام کرنے والے پاکستانی پائلٹس کو وقتی طور پر گراونڈ کر دیا گیا تھا۔ تفصیلات کے مطابق ملائیشیا کی سول ایوی ایشن اتھارٹی کی جانب سے اعلان کیا گیا ہے کہ ملک میں کام کرنے والے تمام پاکستانی پائلٹس دوبارہ بحال کر دیے گئے ہیں۔

ملائیشیا میں اس وقت 18 پاکستانی پائلٹس مختلف ائیرلائنز سے وابستہ ہیں۔ ان تمام پائلٹس کے لائسنسز کی مکمل چھان بین کی گئی۔ تمام پاکستانی پائلٹس کے لائسنس درست قرار دے کر انہیں نوکریوں پر بحال کر دیا گیا ہے۔ ملائیشیا نے پاکستانی پائلٹس کو رواں ماہ کے آغاز میں گراونڈ کیا تھا۔

دوسری جانب سول ایوی ایشن اتھارٹی نے غیرملکی ائیرلائنز میں ملازمت کرنے والے 96 پاکستانی پائلٹس کے لائسنس کلیئر قرار دے دئیے۔

بتایا گیا ہے کہ غیرملکی ائیرلائنز میں موجود 104 میں سے 96 پائلٹس کے لائسنس کلئیر ہیں ۔جب کہ مزید 8 غیرملکی ائیرلائنز میں کام کرنے والے پائلٹس کے لائسنس کی تصدیق کا عمل جاری ہے۔ کلیئر پائلٹس ہانگ کانگ،متحدہ عرب امارات،ملائیشیا، بحرین، ترکش، ویتنام اوردیگرائیرلائنز سے منسلک ہیں۔ مجموعی طور پر غیرملکی ائیرلائنز میں 104 پاکستانی پائلٹس کی لائسنس تصدیق مانگی گئی تھی۔

سی اے اے سے جاری تمام پائلٹس کے لائسنس مصدقہ اور اصلی ہیں تاہم لائسنس پروسیس کے کمپیوٹر پر ہونے والے امتحانات میں کچھ تضادات ہیں۔ خط کے مطابق کمپیوٹر امتحانات میں مشکوک پائلٹس کو گراؤنڈ کرکے جواب طلب کیا اورپائلٹس سے جواب 1994 کے سی اے اے قوانین کے مطابق مانگا گیا۔ خیال رہے کہ گزشتہ دنوں وفاقی وزیر ہوابازی نے 262 مشکوک پائلٹس کی فہرست جاری کی تھی جس کے بعد کئی ممالک نے پاکستانی پائلٹس کو گراونڈ کر دیا تھا۔